جرمن مقبوضہ یورپ کے تمامتر علاقوں میں جرمنوں نے یہودیوں کی پکڑ دھکڑ شروع کر کے اُنہیں مقبوضہ پولینڈ میں قائم قتل کے مراکز میں جلاوطن کرنا شروع کر دیا۔ کچھ یہودی چھپ جانے کے باعث یا جرمنی کے زیر کنٹرول یورپ سے فرار ہو کر بچ جانے میں کامیاب ہو گئے۔ مقبوضہ یورپ سے فرار کے کچھ راستے مخالف ریاستوں (مثلاً سوویت یونین)، غیر جانبدار ریاستوں (مثلاً سوٹزرلینڈ، اسپین، سویڈن اور ترکی) اور اُن ریاستوں کی جانب بھی لے جاتے تھے جو جرمن حلیف تھیں (مثلاً جرمنی کے قبضے میں آنے سے پہلے اٹلی اور ہنگری)۔ سوویت یونین پر جرمن حملے کے بعد دس لاکھ سے زائد سوویت یہودی پیش قدمی کرتے ہوئے جرمنوں سے بچ کر مشرق کی جانب فرار ہو گئے۔ مزید ھزاروں یہودی بلغاریہ اور رومانیہ میں بحیرہ اسود کی بندرگاہوں سے روانہ ہو کر بحفاظت فلسطین پہنچنے میں کامیاب ہو گئے۔
— US Holocaust Memorial Museum
